Hvernig er best að kreista bólur?

Það verður að viðurkennast að mörgum finnst mjög freistandi að kreista bólur. Bæði er leiðinlegt að vera með bólur og svo er það oft það eina sem maður sér í speglinum þegar þær birtast! Bólur eru sýking í húðinni og í raun samþjappaðar bakteríur. Ef við kreistum bólur þá eru miklar líkur á að það myndist fleiri bólur og við ýtum bakteríum dýpra inn í húðina. Bakteríur á fingrunum eiga greiða leið að húðinni þegar við erum að kroppa og kreista. Þá verður húðin rauð, bólgin og sýkt. Svarið við spurningunni er: Ekki kreista bólur vegna þess að bóla sem er látin vera jafnar sig yfirleitt á innan við viku en bóla sem er kreist er margar vikur að gróa og getur leitt til þess að þú fáir ör.